بۇ بىر نەچچە خىل ۋىتامىننى خالىغانچە تولۇقلاشقا بولمايدۇ

  • A+
تەۋە سەھىپە:بىلىۋىلىڭ

بۇ بىر نەچچە خىل ۋىتامىننى خالىغانچە تولۇقلاشقا بولمايدۇ

بۇ بىر نەچچە خىل ۋىتامىننى خالىغانچە تولۇقلاشقا بولمايدۇ
ھازىرقى تېز رېتىمدىكى تۇرمۇشتا، نۇرغۇن كىشىلەر ئىككىلەمچى ساغلاملىق ھالىتىدە تۇرماقتا، كىشىلەرمۇ بارغانسېرى تەن ساغلاملىقىغا ئەھمىيەت بېرىۋاتىدۇ، ۋىتامىن تولۇقلاشمۇ دىققەت قىلىدىغان مۇھىم نۇقتىغا ئايلاندى، لېكىن ۋىتامىنلار شېكەر، پۇرچاق ئەمەس، ئوخشىمىغان ۋىتامىنلارنىڭ ئوخشاش بولمىغان رولى بار، نېمە كەم بولسا شۇنى تولۇقلاش كېرەك، ئارتۇق تولۇقلىسا ئەكسىچە ياخشى بولمايدۇ.
ۋىتامىننىڭ ئادەم بەدىنىگە بولغان رولى
ۋىتامىن ۋە ئاقسىل، ياغ، قەنتلەر، سۇ، ئانورگانىك تۇز قاتارلىقلار ئادەم بەدىنىدە كەم بولسا بولمايدىغان ئوزۇقلۇق ماددىلار ھېسابلىنىدۇ. ئادەم بەدىنىدە ۋىتامىن كەمچىل بولغاندا، ئۆسۈش، يېتىلىش، كۆپىيىش قاتارلىقلارنىڭ ھەممىسى تەسىرگە ئۇچرايدۇ، ماددا ئالمىشىشمۇ نورمال ئېلىپ بېرىلمايدۇ.
ۋىتامىن A
ئوكسىدلىنىشقا قارشى تۇرۇش، قېرىشنىڭ ئالدىنى ئېلىش ۋە يۈرەك، مېڭە قان تومۇرلىرىنى ئاسراش رولىغا ئىگە بولۇپ، كۆز كېسىلى ۋە كۆز قۇرغاقلىشىش كېسىلىنىڭ ئالدىنى ئالىدۇ.

ۋىتامىن B
بارلىق ئادەم بەدىنى توقۇلمىلىرىدا كەم بولسا بولمايدىغان ئوزۇقلۇق ماددا بولۇپ، يېمەكلىكلەرنىڭ ئېنېرگىيە قويۇپ بېرىشىدىكى مۇھىم ھالقا.
ۋىتامىن C
يارا ئېغىزىنىڭ ساقىيىشىنى ئىلگىرى سۈرۈش، چارچاشقا قارشى تۇرۇش ھەمدە قارشىلىق كۈچىنى يۇقىرى كۆتۈرۈش رولى بار.
ۋىتامىن D
ئادەم بەدىنىدىكى كالتسىينىڭ تەڭپۇڭلۇقىنى تەڭشەپ، كالتسىي بىلەن فوسفورنىڭ قوبۇل قىلىنىش ۋە ماددا ئالمىشىشىنى ئىلگىرى سۈرۈپ، سۆڭەكنىڭ ساغلاملىقىنى ساقلايدۇ.
ۋىتامىن E
ئوكسىدلىنىشقا قارشى تۇرۇش رولىغا ئىگە بولۇپ، قېرىشنى كېچىكتۈرۈپ، يۈرەك، مېڭە قان تومۇرلىرىنى ئاسرايدۇ.
ۋىتامىن K
قان توختىتىش، نورمال قان ئۇيۇش ئىقتىدارىنى ساقلاش رولى بار.
ۋىتامىننىڭ كەمچىل بولۇشى ئادەم بەدىنىگە زور زىيان يەتكۈزىدۇ، لېكىن، ئەگەر بەدەندە ۋىتامىن مىقدارى بەك يۇقىرى بولۇپ كەتسە، ئوخشاشلا چوڭ مەسىلە كېلىپ چىقىدۇ. ئەگەر ۋىتامىننىڭ تەڭپۇڭسىزلىقى ئېغىر بولسا، يەنە ئېغىر كېسەل ياكى زەھەرلىنىشنى كەلتۈرۈپ چىقىرىشى مۇمكىن.

بۇ بىر نەچچە خىل ۋىتامىننى كۆپ تولۇقلىۋەتكەندە زىيانلىق
ۋىتامىن A
كۆپ مىقداردا قوبۇل قىلسىمۇ زەھەرلىنىشنى كەلتۈرۈپ چىقىرىدۇ. ئۆتكۈر زەھەرلىنىشنىڭ ئىپادىلىرى بولسا باش قېيىش، مۈگدەش، باش ئاغرىش، قۇسۇش، ئىچى سۈرۈش قاتارلىقلار. ئاستا خاراكتېرلىك زەھەرلىنىش بولسا سۆڭەك بوغۇمى ئاغرىش، ئىششىش، تېرە قىچىشىش، چارچاش، پۇت-قول ماغدۇرسىزلىنىش، ئاسان ھاياجانلىنىش، قورساق ئاغرىش، ئاياللاردا ھەيز بەك ئاز بولۇش قاتارلىقلار ئارقىلىق ئىپادىلىنىدۇ.
ۋىتامىن B
ۋىتامىن B2 نى زىيادە كۆپ قوبۇل قىلسا بۆرەك ئىقتىدارىغا تەسىر يېتىدۇ.
ۋىتامىن C
0.6 گىرامدا پات-پات سىيىش ئەھۋالى كۆرۈلىدۇ، بىر گىرامدىن ئېشىپ كەتسە تېرىنى قىزارتىپ، ئۈچەينىڭ لۆمۈلدىشىنى كۈچەيتىپ، قورساق قىسمى مۇجۇپ ئاغرىش، ئىچى سۈرۈشنى كەلتۈرۈپ چىقىرىدۇ. ۋىتامىنC دىن 12 ~ 4 گىرامغىچە ئىستېمال قىلغاندا، سۈيدۈك كىسلاتا تۇزى سۈيدۈك يولىدا چۆكمە بولۇپ تاش پەيدا قىلىدۇ.
ۋىتامىن D
ئەگەر زىيادە قوبۇل قىلىنسا كۆڭلى ئېلىشىش، ئىچى سۈرۈش ئەھۋاللىرى كۆرۈلىدۇ، يەنە كۆپ ئىچكى ئەزالار نۇقتىسىمان كالتسىيلىشىش، سۆڭەك ئاغرىش قاتارلىق زەھەرلىنىش ئالامەتلىرى كۆرۈلىدۇ.
ۋىتامىن E
ئۇزاق مۇددەت ئىچىش مىقدارى كۈنىگە 800 مىللىگرامدىن ئېشىپ كەتسە، ئىچكى ئاجراتما مېتابولىزمى، ئىممۇنىتېت رېئاكسىيە ھالىتىنى ئۆزگەرتىپ، جىنسىي ئىقتىدارىنى تۆۋەنلىتىۋېتىدۇ ھەمدە قان نوكچىسى مەنبەلىك ۋېنا ياللۇغى ياكى ۋېنا توسۇلۇش ئېھتىماللىقى پەيدا بولۇشى مۇمكىن.

ۋىتامىن تولۇقلاش
ئويلاپ قالغىنىڭىز بوتۇلكىدىكى ۋىتامىن تولۇقلاش دورىسىغۇ؟ ئەمەلىيەتتە كۈندىلىك يېمەك-ئىچمەككە كۆپرەك دىققەت قىلغاندا، بۇ مەسىلىنى زور دەرىجىدە ياخشىلىغىلى بولىدۇ.
تەركىبىدە ۋىتامىن A مول بولغان يېمەكلىكلەر: كالا سۈتى، تۇخۇم، سەۋزە، كۆكتات يوپۇرمىقى، بېلىق مېيى، قىچا، مۇچ، پەمىدۇر.
تەركىبىدە ۋىتامىن E مول بولغان يېمەكلىكلەر: كۈنجۈت، ياڭاق مېغىزى، ئورۇق گۆش، سۈت تۈرىدىكىلەر، تۇخۇم تۈرىدىكىلەر، خاسىڭ مېغىزى، ئوسۇڭ قاتارلىقلار، بۇنىڭدىن باشقا، دادۇر، خاسىڭ، ياڭاق، گازىر، ھايۋانات جىگىرى، تۇخۇم سېرىقى، قايماق ھەمدە كۆممىقوناق، سېرىق-يېشىل كۆكتاتلار بار.
ۋىتامىن K تەركىبى مول بولغان يېمەكلىكلەر: يېڭى كۆكتاتلار.
تەركىبىدە ۋىتامىن D مول بولغان يېمەكلىكلەر: بېلىق مېيى، تۇخۇم قاتارلىقلار.
ۋىتامىن B1 مول بولغان يېمەكلىكلەر: گۆش، ئېچىتقۇ، پوستى بار مېۋىلەر، دانلىق زىرائەت، پۇرچاق، قاتتىق پوستلۇق مېۋە، ھايۋانلارنىڭ ئىچكى ئەزالىرى.
ۋىتامىن B2 مول بولغان يېمەكلىكلەر: گۆش، سۈت، بۇغداي ئۇنى، قوي بۆرىكى، قىچا، توخۇ جىگىرى، گۈرۈچ، تۇخۇم، تەرخەمەك.
تەركىبىدە ۋىتامىنB5 مول بولغان يېمەكلىكلەر: جىگەر، ئېچىتقۇ، دانلىق زىرائەتلەر. يوپۇرماق كىسلاتاسى مول بولغان يېمەكلىكلەر: كۆكتات يوپۇرمىقىدا يوپۇرماق كىسلاتاسى مول، تۇخۇم، پۇرچاق تۈرىدىكىلەر، ئېچىتقۇ، يېشىل يوپۇرماقلىق كۆكتاتلار، مېۋە ۋە قاتتىق پوستلۇق مېۋىلەردە مول.
تەركىبىدە ۋىتامىن B12 مول بولغان يېمەكلىكلەر: جىگەر، گۆش، تۇخۇم، سۈت. تاماق تەركىبىدىكى ۋىتامىن B12 ھايۋانات تۈرىدىكى يېمەكلىكلەردىن كېلىدۇ، ئاساسلىق يېمەكلىك كېلىش مەنبەسى گۆش، ھايۋانلارنىڭ ئىچكى ئەزالىرى، بېلىق، قۇش، قۇلۇلە تۈرىدىكىلەر ۋە تۇخۇم تۈرىدىكىلەر بولۇپ، سۈت ۋە سۈت مەھسۇلاتلىرىنىڭ تەركىبىدىكى مىقدارى بىر قەدەر ئاز بولىدۇ. ئۆسۈملۈك مەنبەلىك يېمەكلىكلەر تەركىبىدە ئاساسىي جەھەتتىن ۋىتامىن B12 بولمايدۇ.

تەركىبىدە ۋىتامىن C مول بولغان يېمەكلىكلەر: لىمون، كۆكمۇچ، يېسىۋىلەك، بەرەڭگە، پالەك، پەمىدۇر، ئاپېلسىن، ياۋا چىلان قاتارلىقلار.
تەركىبىدە B3 مول بولغان يېمەكلىكلەر: پۈتۈن بۇغدايدىن ئىشلەنگەن يېمەكلىكلەر، يىرىك گۈرۈچ، ماش، كۈنجۈت، خاسىڭ، موگۇ، قىزىل دېڭىز يۈسۈنى، ئەنجۈر، سۈت مەھسۇلاتلىرى، تۇخۇم، توخۇ گۆشى، جىگەر، ئورۇق گۆش، بېلىق قاتارلىقلار. تەركىبىدە ۋىتامىن B6 مول بولغان يېمەكلىكلەر: تەركىبى ئەڭ يۇقىرى بولغىنى ئاق رەڭلىك گۆش (مەسىلەن، توخۇ گۆشى ۋە بېلىق گۆشى)؛ ئۇنىڭدىن قالسا ھايۋانات جىگىرى، پۇرچاق تۈرىدىكىلەر ۋە تۇخۇم سېرىقى قاتارلىقلار؛ مېۋە ۋە كۆكتات تەركىبىدە ۋىتامىن B6 مىقدارىمۇ بىر قەدەر كۆپ. سىز ۋە ئائىلىڭىزدىكىلەرنىڭ سالامەتلىكى ئۈچۈن، ۋىتامىننى توغرا ئىشلىتىپ، يېمەكلىك ئارقىلىق تولۇقلاشنى ئاساس قىلىشتا چىڭ تۇرۇپ، دورا ئارقىلىق تولۇقلاشنى قوشۇمچە قىلىش پرىنسىپى بويىچە ساغلام تۇرمۇش كەچۈرەيلى.

ئىنكاس يىزىش

:?: :razz: :sad: :evil: :!: :smile: :oops: :grin: :eek: :shock: :???: :cool: :lol: :mad: :twisted: :roll: :wink: :idea: :arrow: :neutral: :cry: :mrgreen: